//立法會財務委員會於2022年2月15日批准延長為學生貸款還款人提供的免息延遲償還貸款安排，由2022年4月1日起，為期兩年。//
以前有講過「識得還學債，一定係分15年還！」，因為還款年利率都係1釐至1釐幾。即係借十萬，一年都係畀千幾蚊息。而每年通脹喺幾%情況下，點都係冇蝕底。最重要嘅係，如果經濟真係好差，好大機會都會畀你免息遲還學債。其實兩年前，學資處已經「批准為學生貸款還款人提供為期兩年的免息延遲償還貸款安排」，估唔到而家又再延長。前前後後，延長咗四年。
原本以先生已經係揀咗15年分期還學債，而家延長咗四年，變相還到四十幾歲先還得完。當然啦，大家可以揀唔延長，如常繼續還錢。但係呢，以先生就唔會噉做啦，因為差學債TU又唔會有紀錄，而且延長還款又唔使息，喺年年通脹情況下，梗係唔使急住還啦。
好多人唔借學債，係擔心畢業之後冇錢還，到時被政府追討，但又唔使太過憂慮。以前提過，借十萬，分15年還，每個月都係還$500幾蚊左右。喺一般情況之下，就算你份人工好低，都應該還得到。就當你唔好彩，失業好長時間，真係冇經濟能力，都唔使太擔心，因為你可以填表「申請延期償還助學金或貸款」。
//「百分百擔保個人特惠貸款計劃」的申請期延長至2023年4月底。最高貸款額由借款人在職期間平均每月收入的六倍增加至九倍，上限由8萬港元提升至10萬港元。另外，計劃下的最長還款期由六年延長至十年，而還息不還本的安排則由12個月延長至18個月//
以前提過「雖然「失業貸款」反智，但係借好過唔借！」，而家最新嘅「失業貸款」，可以借多啲之餘，仲可以延長至十年還，頭十八個月甚至可以還息唔還本。攤長十年嚟還，每個月還嘅錢，都唔算話好多，對失業人士嚟立講，呢筆貸款都叫可以解燃眉之急。
總結，貸款只係一個工具，貸款本身並冇問題。大前提係，貸款利息唔貴，大家用得其所，量力以為。//借定唔借？還得到先好借！//
