失業窮到褲穿窿點先好？正常嚟諗，梗係幫你搵份工，或者係設立失業救濟金，但係《財政預算案》竟然提出「失業貸款」…，既然冇辦法改變呢個政策，惟有諗下，點先可以利用「失業貸款」解燃眉之急。
「失業貸款」嘅息口絕對係超平！實際年利率係1%( 即係借一萬一年先還給$100利息)，可以最長分6年還，頭12個月仲可以揀還息不還本。還哂啲貸款同利息之後，仲會回贈返哂啲利息畀你。所以，簡單嚟講，即係免費借錢畀你使。如果以先生借到，一定會借，因為而家銀行就算超平貸款，年利率都講緊接近2%，但事實往往都要3–4釐。
客觀嚟講，就算你借完錢唔使，放喺虛擬銀行，收1%活期，都淨賺冇蝕。如果用嚟買ibond，仲有2%回報。當然啦，借得呢筆錢，都係失緊業，山窮水盡，所以都唔會擺喺銀行或者買股票。雖然借錢度日，唔係一件好事，但係呢筆貸款最長可以分5年，如果借足8萬，一個月都係還一千蚊多啲，對失業人士嚟講，都可以負擔。
不過，以先生覺得，與其推行呢啲「失業貸款」政策，倒不如都係老老實實設立失業救濟金，等啲失業人士可以過度到，搵到份工，捱過呢個災情。
