借唔借學資處貸款好？答：一定要借，因為年利率低，仲可以攤分15年還！
而家「大專學生免入息審查貸款」年利率係1.106釐(可調整)，即係借一萬蚊，一年淨係還$110 息，其實係相當之平。香港每年通脹，講緊最少都2–3%，而銀行嘅低息貸款，最平都要2–3%年利率，所以學生貸款其實係相當抵借！
以一年$42,100 學費以為，借足4年，就係168,400。如果分15年還，每個月都係還$1,042左右，還足15年，一共畀$187,498，利息加埋都係2萬蚊左右咋！
如果經濟有困難，突然冇錢還學債，點算好？都係唔借了…，其實係唔使太擔心嘅
假設大家真係噉唔好彩，有經濟困難，每個月還唔到個千幾蚊，其實都冇問題，大家可以填表「申請延期償還助學金或貸款」。今次世紀疫症，學資處已經「批准為學生貸款還款人提供為期兩年的免息延遲償還貸款安排」，即係可以遲還多兩年。所以，大家真係唔使過份擔心。
借咗學生貸款，會唔會影響環聯「TU」信貸報告㗎？到時買樓咪有影響？答：係冇影響嘅！除非你唔還錢，畀律政司告。
借學生貸款，其實係唔入環聯信貸記錄。不過，如果大家連續兩季/六個月冇還錢，就會被視為「拖欠還款個案」，到時就有機會畀律政司告，噉就有機會影響環聯信貸記錄啦。
結論，有得借學生貸款，一定要借，仲要分15年還！如果你屋企經濟唔係咁好嘅，借學貸可以減輕屋企人負擔。相反嘅，你可以借嚟用作生活費，或者學下投資，都係冇蝕底嘅。
如果想更多有關極簡環保、財務管理、黃店介紹以及生活的照片，歡迎FOLLOW我們的IG～ YIMUT7.13
