【信用卡攻略】東亞免息免手續費卡冚卡有恒常化趨勢，夾埋恒生信用卡一齊用，好好用！

東亞「網上結餘轉戶」係指用信用卡餘額「繳付非東亞銀行之信用卡、私人貸款或循環貸款之結欠」。只要大家有收到推廣優惠，就可以憑指定東亞信用卡，找其他銀行卡數或貸款。用嘅時候，會先收咗5%手續費，所以大家要預留足夠信用額，過咗大概兩個月先會回贈返畀你。

可能大家會奇怪，之前咪寫過東亞可以卡冚卡囉，點解又要寫多次？因為以先生觀察到呢個推廣優惠，有恒常化趨勢，幾乎每個月都會收到，而且都係同一張「指定信用卡」。當然啦，唔係每次都有現金回贈，而且要求都有少少唔同。例如，有時要求繳付累積滿HK$10,000，有時就HK$15,000，所以大家要留意返清楚。

4月「網上結餘轉戶」要求繳付「累積滿HK$15,000」先可以免息免手續費，同6月「累積滿HK$10,000」要求唔同。

「我東亞信用卡得幾萬信用額，都冇乜用啦…」事實又係咪呢？

如果大家有恒生信用卡，只要用恒生信用卡入錢落東亞信用卡就解決咗呢個問題。舉例，以先生就用恒生信用卡入咗6萬落東亞信用卡，變相有10萬(4萬+6萬)信用額，可以拎嚟找其他銀行卡數。當然啦，大家都可以向東亞銀行申請永久加額啦，但係就未必成功。

5月份嘅「網上結餘轉戶」手續費，喺7月2日已經回贈咗，而且仲拎咗$100 回贈。

用東亞信用卡找恒生信用卡，之後用恒生信用卡找返東亞信用卡，咪變相無限LOOP？

理論上就係，加埋渣打免息免手續費套現10萬蚊，就更加係無限LOOP。不過，如果銀行突然「收水」，唔再推呢啲惠優，大家又冇足夠現金流，就會好大獲，所以要量力以為。

總結，東亞信用卡識得用其實好好用，不過申請信用卡時記得要「接受推廣」先會有呢啲優惠。大家要記住，「網上結餘轉戶」要預先收5%手續費，之後先會遠返畀你，所以要預返足夠信用額。

最後，大家謹記卡數始終要還，卡冚卡只係增加現金流，或者解燃眉之急，千祈唔好本末倒置，先使未來錢，攪到債台高築。