銀行不時都會有推廣，如果申請信用卡嘅時候，撳咗「拒絕接受推廣」，就會冇咗好多著數。
好似東亞銀行噉，之前就有HK$10,000「好用錢」計劃(即係喺信用卡拎一萬蚊出嚟入落你戶口，係免息免手續費，如果有4張信用卡，就可以套現$40,000)。之前我成日都收唔到呢啲推廣，原來就係因為揀咗「拒絕接受推廣」。如果想改返，就要打電話去客戶服務熱線改返。
除咗以上限時推廣外，東亞經常有網上結餘轉戶推廣，即係卡冚卡(用東亞信用卡找其他銀行信用卡)，仲有回贈送埋畀你！
不過，通常呢啲推廣都會寫住「指定東亞銀行信用卡帳號」。換言之，唔係張張卡都會有。如果你張信用卡，有3萬信用額，千祈唔好用哂嚟找其他信用卡，因為要預留5%手續費(過一兩個月後，再入返落你信用卡戶口)，即係要有$31,500 ($30,000 + $1500 手續費)信用額先得。如果唔係，你就要畀超額手續費。不過，你都可以入定$1500落信用卡度，咁就冇問題啦。
不過第一次找其他銀行卡數，要先去分行填form登記，通常第二日就可以用到(如果你本身用信用卡做提款卡，可能要額外填多張form，所以記得同職員講返)。
東亞推廣，有時都會縮皮，結餘轉戶只會回返手續費，但冇額外回贈。
但係有時都會有驚喜，唔係指定信用卡，而係每張信用卡都可以結餘轉戶。
