Member-only story
唔好買保險阿，保險搵笨！供款年期長，又唔可以斷供，仲有可能蝕錢，買嚟做乜？
保險都有好多種，好似有醫療、危疾、意外同人壽等等。而好多人覺得搵笨嘅保險，其實就係儲蓄保險，即係供款年期長，又唔可以斷供，供完十幾年之後，又話乜乜滾儲，一個月收返幾多錢之類。以先生一向唔鼓勵人哋買儲蓄保，因為除咗冇彈性之外，回報偏低(年回報講緊2–3%咋，嗰啲非保證回報，就唔計啦)。與其買儲蓄保，大家不如買保險隻股票可能賺得仲多，仲未計美股被動型ETF，好似VOO噉，過去十年平均回報都14%左右。既然係噉，做乜要買儲蓄保？當然啲從業員會話，幫你儲起啲錢，買股票有風險之類。不過，如果美股VOO (追蹤S&P500指數，美國500大企業)呢啲回報差，儲蓄保回報都唔慌會高，因為佢都係用你啲錢投資之嘛。仲有，點解某啲保險從業員會咁高人工？因為你份儲蓄保單，頭一年有一大部份，會成為佢哋嘅佣金。
保險好貴阿，我呢啲窮人邊買得起阿？
大家覺得保險好貴，多數都係一啲所謂供得斷嘅保險，例如25年就供斷嘅危疾兼人壽嘅儲蓄保(即係如果冇事冇幹，就可以拎返供咗嘅錢)。呢啲保險好唔好呢，就見仁見智，但係保費就通常好貴。平均一年都講緊萬幾蚊起跳，所以對一般打工仔嚟講，都係好大負擔。但係，如果買一啲供唔斷嘅保險，好似危疾噉，以先生未到三十歲，一年都唔使畀$1,000。而醫療保險，以自願醫保(標準計劃)嚟講，一年都係兩千幾蚊，所以其實唔算話好貴。
使乜買保險啫？有事咪住公立醫院囉！
其實唔講，大家都知，如果有咩頭暈身㷫，喺公立醫院排期都排死你。以先生之前有朋友踢波整斷十字韌帶，做手術就使咗幾萬蚊。佢話如果排公立醫院，就要等成年先有得做手術。正正因為買咗保險，先可以喺私家醫院做手術。對有錢人嚟講，幾萬蚊濕濕碎啦；但對窮人嚟講，已經係好大負擔。斷十字韌帶呢啲手術，已經唔算好貴，如果係癌症呢？分分鐘要使成百萬，噉樣儲儲埋埋就冇哂，等於白做一世！
點解要買保險？講到尾，都係平衡風險，做風險管理。
點會冇啦啦有危疾阿？去旅行又使乜買旅行保阿？我咁多年嚟，都係平安渡過，以先生過份憂慮啦。即係噉，雖然冇啦啦大病嘅機會好低，但值唔值得冒呢啲風險？一年先畀千幾，二千蚊，加埋最多四五千蚊，就可以唔使擔心呢啲問題。如果真係中癌症，唔使冇啦啦使百幾萬，攪到自己一夜之間冇哂積蓄。所以，點解話越窮先越要買，因為有錢人使多少少，都係閒錢。但係，如果窮人大病，冇保險，就真係成幅身家都唔夠畀！
利申：唔係保險從業員，亦都冇收錢賣廣告
我們的IG: yimut.713
