【信用卡攻略】東亞信用卡免息免手續費套現，仲送埋錢畀你使！

東亞「網上結餘轉戶」係指用信用卡餘額「繳付非東亞銀行之信用卡、私人貸款或循環貸款之結欠」。今次東亞「賣大包」，唔使收到推廣電郵，唔使用指定信用卡，都可以享有呢次優惠。

可以用嚟找其他銀行卡數，兼免5%手續費，仲最多送$350回贈，係咪真係咁著數阿？真係有，不過有幾點大家都要留意返，以免中伏！

1. 「網上結餘轉戶金額累積滿HK$10,000，方合資格獲得網上結餘轉戶手續費豁免。」換言之，如果你張卡找其他銀行卡數，加埋唔夠一萬，就冇得免手續費。記住，係每張卡，獨立計算。
2. 「優惠有效期由2021年12月1日至2021年12月30日。」明明12月就有31日，不過，呢個優惠剩係去到30號咋！
3. 「獎賞將於2022年2月28日或之前以現金回贈方式存入指定信用卡賬戶，並顯示於結單內。」簡單嚟講，5%手續費，係畀咗先，之後2–3個月內先入返落你信用卡。
4. 用東亞信用卡找「非東亞銀行之信用卡、私人貸款或循環貸款之結欠」時候，記得預留5%手續費信用額。舉例，如果你張信用卡有3萬信用額，即係要有$31,500 ($30,000 + $1500 手續費)信用額先得。如果唔係，你就要畀超額手續費。

我有幾張東亞信用卡，係咪可玩卡海？

冇錯！因為呢次推廣，冇指定邊張信用卡，如果你有5張信用卡，就可以賺到千幾蚊回贈。

信用卡我係有，不過邊有十萬信額阿，點玩阿…

冇都唔緊要。因為你可以真金白銀入錢玩，或者透過恒生信用卡，入錢落東亞信用卡，咁就變相多咗信用額。

大家謹記卡數始終要還，卡冚卡只係增加現金流，或者解燃眉之急，千祈唔好本末倒置，先使未來錢，攪到債台高築。

渣打、恒生、東亞、大新，同Citibank 信用卡唔係互相對立，大家可以一齊用嚟增加現金流，免息免手續費延遲找卡數。所以，大家記得一早申請，以免卡到用時方恨少！