【股票小知識】月供盈富基金(2800)兩年半，到最後黯然離場

月供被動型ETF(又稱跟蹤指數ETF)冇問題，但係如果月供盈富基金(2800) ─ 跟蹤恒生指數，就唔係噉講，因為近呢十年嚟都係冇突破，近呢個月仲急跌。

以前唔識買股票，聽人講買被動型ETF實冇死，而香港最出名嘅就係盈富基金(2800)，買2800就變相買咗58隻恆生指數成份股。而每個月供2800，仲可以做到平均成本法 ─ 不問股價，定期定額投資，長遠可以拉勻成本，減少市場波動對投資影響。所以，以先生喺2018年7月就開始月供2800，供咗接近兩年半。

因為以先生係用銀行月供2800，所以每個月大概都係11號，不問價位買入。而盈富基金喺2019年4月嘅股價曾經去到$30，而其後不斷升升跌跌，係災情之前價位一度重返$30。不過，災情之後股價急跌，一度跌到得返$24左右。而去到2021年1月尾，價位再重返$30。不過，近呢一個月嚟2800急跌，跌到$25左右，比較半年前，2800已經跌咗差唔多10%。

隨住香港形勢發展，又參考咗恒指過往嘅表現，加上開始認識美股。所以，今年年頭，以先生就喺$30.22 高位賣咗2800，連埋股息，賺咗$53,000左右。喺4月份，清倉咗港股，而開始買美股。

如果當初冇喺高位賣咗2800，而家喺價位上仲蝕緊，因為平均買入價係$26.79，雖然計埋股息都仲係賺萬幾蚊，不過就差得遠。

總結，月供2800值唔值得就見仁見智，但係比較美股三大指數，港股近十年嚟，幾乎原地踏步，甚至每況愈下。相反，美股就不斷破頂，就算曾經跌到熔斷，但好快就收復失地。所以，大家買賣股票，唔應該局限喺香港，而要放眼世界。

放棄港股，買美股ETF，4個月賺咗10%

如果想更多有關極簡環保、財務管理、黃店介紹以及生活的照片，歡迎FOLLOW我們的IG～ YIMUT7.13