買美股大型嘅被動型ETF，基本上係好難輸，可以話係瞓喺度賺錢。以先生今年3月尾，買咗VTI ─ 追蹤美國整體市場指數，7月尾賣出嘅時候，賺咗差唔多10%。
計埋股息，以先生賺咗9.9%，約HK$11,814 (成本係HK$119,340)。如果而家仲未賣出VTI，會賺得更多，因為股價已經升到$230.15，即係賺大概13%。而以先生賣出VTI，只不過係轉咗做VOO ─ 追蹤標普500的ETF。
買美股大型嘅被動型ETF，係咪未必賺？睇下數據就知，數據冇得呃人。10年嚟VTI嘅總回報係14.7%，雖然有啲年份，VTI係蝕錢，好似2002, 2008, 2018年，但係大部份時間，都係賺緊錢。
冇比較冇傷害，盈富基金(2800)十幾年嚟，不升反跌，但美股VTI，升咗差唔多兩三倍。盈富基金喺2007年11月2日，係$30.5；到咗2021年8月13日，只係值$26.9。當然啦，計埋股息，都唔會蝕嘅。但係，未必係好嘅投資。
