【生活隨筆】得一個幾毫又嘥時間，點解要喺Medium寫文？

唔知嘅人，以為喺Medium寫文會搵唔少，但現實只係一個幾毫，所以如果以「投資」角度，真係唔多值得。

諗住靠Medium 搵下被動收入，點知得7仙

大家睇一篇文可能只係兩三分鐘，但係寫一篇文往往用唔少時間，由構思到落筆，閒閒哋都講緊成粒幾兩粒鐘。曾經諗住一個星期可以出兩篇文，但有時都達唔到標，因為寫文真係嘥唔少時間同心機，唔係求其就可以寫到。

既然係噉，點解仲要寫文呢？而且喺Medium寫啲文又唔係好多人睇，唔通真係貪過癮？

1. 寫文想訓練自己嘅表達組織能力。自從畢業之後，都唔使點寫嘢，發覺自己寫作能力差咗唔少。寫文要諗下組織鋪排，點先可以令讀者清晰易明，都唔係咁簡單。所以希望持之以恆，重拾自己寫作能力。
2. 喺Medium 寫文，發現唔少志同道合嘅朋友。比較英文文章，雖然喺Medium 嘅中文文章唔算話好多，但係唔少都係高質。例如，有人堅持用粵文寫文章；有人深入淺出講解銀行資訊；亦有人定期出文寫故事。
3. 點解唔喺Facebook 寫文？雖然Facebook 好多人用，但係Facebook 資訊泛濫，又太多廣告，好多時大家碌完，畀個like 就算，比較少深入去睇文。而呢一兩年以先生就好少用Facebook，因為覺得太嘥時間，又容易上癮，一碌就唔見一頭半個鐘。

圖文不符，拍攝於南丫島

總結，雖然喺Medium 寫文搵唔到食，又用唔少時間。但係，可以搵到唔少志同道合嘅朋友，而透過寫文，可以訓練返自己嘅表達組織能力。所以，都係值得嘅！

我們的IG: yimut.713