Member-only story
信用額係逐張卡獨立計，定係共同信用額？
逐張信用額計：恒生、匯豐、東亞、AEON
共用信用額：中銀、DBS、Citibank、建行、工銀、大新、渣打
雖然渣打信用卡係共用信用額，但係渣打嘅MANHATTAN信用卡(近呢幾年都已經冇得申請)係分開計。由於有啲信用卡，以先生淨係得係一張，或者冇申請，所以未必知係咪共用信用額。
信用卡回贈，係積分定係現金回贈好啲？
好多時啲銀行話，每簽帳一蚊有一積分回贈，有時仲大大聲宣傳，話自己有3x 積分回贈，聽落去好似好多，其實好少，仲有啲搵笨。如果簽帳一萬蚊，有10,000積分，即係有幾多錢回贈呢？答案係$40，計返條數即係0.4%回贈，如果話3x 積分回贈，都係得1.2% 回贈咋！即係簽一萬蚊，回贈$120。一般而言，啲銀行要25,000積分，先可以換$100(不過，東亞要28,000分先可以換$100 coupon)。
相反，現金回贈就唔同，簡單清昕易明。好多時講到明，有幾多%回贈，好似大新ONE+有1%回贈，渣打Simply Cash、ICBC星座卡有1.5%回贈，安信EARNMORE銀聯2%回贈。有啲甚至有4%回贈，好似HSBC Red Card，不過就要網上簽帳。有啲就要指定類別，好似渣打Smart Card 有5%回贈，但係要喺759阿信屋、百佳、DONKI、屈臣氏等。現金回贈，多數係結單日計返現金回贈，如果1.5%回贈，簽一萬就回贈$150。不過，各間銀行都略有不同，有啲要手動換現金回贈，有啲就自動兌換。
一句講哂，邊樣好啲？答案：現金回贈。因為現金回贈唔會過期，但係積分回贈會過期，如果唔夠25,000 積分就未必換到coupon。
信用卡分期使唔使畀手續費？唔夠信用額做唔做到？
信用卡分期使唔使手續費，視乎你買嘅商品有冇同銀行合作，如果有合作，通常都有12–24個月免息免手續費分期。如果要收手續費，我一定唔會揀分期，因為分期通常都回贈得少啲，如果要收埋手續費，根本冇著數。
如果唔夠信用額，係做唔到分期。當你買一部電腦，要$15,000，但係你得$10,000信用額，喺噉嘅情況下，係做唔到分期，因為你差$5,000 信用額。可能你會話，我分期12個月，每個月都係畀千幾蚊，點會唔夠信用額？但係，條數唔係噉計。因為，你分期買嘢，銀行會先hold起你嘅信用額，當你每個月還卡數嘅時候，就會逐啲加返你嘅信用額。
其實仲有其他分期計劃，好似月單結分期，信用卡套現分期等，不過呢啲都係要手續費，至於抵唔抵就見仁見智。
VISA, Master, 銀聯, AE, JCB有咩唔同？
