信用卡係咪一定要畀年費？
大部份信用卡要可以申請年費豁免，除咗AE (美國運通)信用卡例外。事實上，而家好多信用卡都大大隻字寫住「永久豁免年費」。不過，就算冇都唔緊要，因為只要你打電話，有時甚至唔使真人對話，撳個制就可以豁免。話雖如此，有時銀行會改變政策，有啲信用卡突然冇得豁免年費，好似前幾日渣打銀聯卡收咗我年費，打去客務熱線都冇得豁免，最後以先生惟有CUT卡保平安。只要你CUT卡，年費就唔使繳交。至於AE卡，雖然好多著數，但係一向係冇得豁免年費，大家留意返。
信用卡找卡數係咪好麻煩？
(1) PPS繳費靈。大家只要帶定銀行提款卡去OK便利店，搵「繳費靈」終端機，就可以開戶。佢係綁定你銀行戶口找卡數。至於繳費靈(PPS)之常見問題，大家可以去返官網睇返。大家要謹記，PPS嘅截數時間係星期一至星期五晚上七時正。換言之，星期六日係冇得找卡數。今日找嘅卡數，聽日先會見到，大家記得預返一兩個工作天。
(2) 銀行e-banking。如果你本身用匯豐銀行，自然可以用嚟找返匯豐銀行嘅信用卡。但係，除此之外，銀行本身都可以直接找其他卡數，好似恒生同匯豐銀行噉，可以用轉數快即刻找其他銀行卡數，不過AEON、安信嘅信用卡就找唔到。而大新銀行，亦都可以用嚟找其他銀行卡數，只要用銀行戶口找卡數就唔收手續費，而用大新銀行信用卡找其他銀行卡數，就要收1%手續費。
(3) 自動轉賬。如果大家驚唔記得找卡數，呢個都係一個好方法。只要大家填妥直接付款授權書，再交去分行就可以。不過，網上提到設定自動轉帳授權指示，一般需時6–8星期處理，所以大家預留返啲時間。
其實，每間銀行都會清楚寫明「信用卡繳款方式」，例如安信、AEON。所以，大家唔使擔心唔識交卡數。
咩係截數日阿？幾時要交卡數？要交幾錢阿？
