Member-only story
隨住電子支出工具「收水」情況下，而家可以套現啲數額越嚟越少。以前全盛時期 WeChat 可以免息套現幾萬，Alipay 可以套現$5,000，PayMe 可以套現一萬。不過，都俱往矣。而家WeChat, Alipay, PayMe 都只係可以免息套$1,000，真係攝牙罅都唔夠，不過叫做好過冇。
而家PayMe 竟然逆市而行，話可以增值$3,000？原來只係預親生仔─匯豐信用卡！
其實PayMe 初初真係領先全港，嗰陣Wechat, Alipay 都未流行，同其他人講，人哋仲唔知你講乜，以為你講大陸嘅電子支付工具。而PayMe 最初可以增值$10,000，之後再做增值$5,000，再之後變$2,000，最後上年10月改做$1,000。電子支付工具套現越縮越少，某程度都係PayMe 帶頭，之後其他平台效法，最後大家「受害」(雖然以先生都知銀行唔係開善堂…)。
噉PayMe 嚟緊8月可以用匯豐信用卡增值$3,000 係咪算益街坊？其實叫做好過冇，雙方都有著數。
原本以為PayMe增值冇回贈，但29/07收到 EMAIL，用匯豐信用卡每增值$250會有$1「獎賞錢」回贈，即係增值$3,000 有$12 回贈。如果大家用其他銀行，好似大新同DBS嗰啲1%現金回贈信用卡，每個月都只係賺$10 。之前啲文章都提到，恒生信用卡可以免息免手續找匯豐信用卡，所以變相大家可以遲1–2個月先找$3,000卡數，雖然唔係好多，但好過冇。
總結，其實PayMe可以增至到$3,000 對大家都好，因為會多咗市民用PayMe 去商戶買嘢，而匯豐又可以喺商戶到收返啲手續費。而市民用匯豐信用卡增值，PayMe 應該都唔使用畀手續費啩？或者只係向VISA/MASTER 畀返少少，所以算係雙嬴。
