2021年6月嗰陣提過，Mox Bank找其他銀行卡數相對ZA bank嚟講，係冇咁方便，因為後者係透過轉數快即時找卡數，但前者係要第二日先收到，仲要係星期一至五(1600或之前截數)。但冇諗，係2021年12月開始，Mox Bank竟然可以用Mox 信用卡找其他銀行卡數，仲要冇息冇手續費，仲好用過恒生。
Mox卡冚卡涵蓋範圍比恒生信用卡更廣。
恒生信用卡雖然可以找好多間銀行嘅信用卡，但至少AEON、中銀、建行、花旗、星展、安信嘅信用卡係找唔到。因此，Mox信用卡正正彌補咗呢方面嘅不足。
點申請Mox信用卡阿？使唔使畀入息證明？
因為Mox係虛擬銀行，大家只要喺手機APP Store 搵「Mox」，下載完就可以直接喺手機開戶，佢會問你開唔開埋Mox Credit Card，大家照申請埋就得。根據以先生實測，一般情況之下，都會好似官方所講「即時知道申請結果」，唔使畀入息證明，都可以申請到信用卡，但信用額就唔會好高，如果想提高信用額，就要畀入息證明。但係，都有機會唔係即時開到，如果你係退咗休/家庭主婦，佢有機會叫你畀資產證明佢睇。另外，因為佢係即時查閱「環聯信貸評級」，如果你信貸麻麻，都好大機會唔批。
點用Mox Credit Card卡冚卡？使唔使等埋張實體卡先？
