一餐飯，出街食，閒閒哋都講緊三四十蚊，連埋嘢飲超過五十都唔出奇，嗰陣啱啱畢業，搵得萬幾蚊，就諗住每日慳返十幾廿蚊，一個月慳返幾百蚊，就開始咗每日叮叮飯嘅日子。
點先可以儲多啲錢呢？啱啱出嚟做嘢嘅時候，左諗右諗，覺得自己已經好慳，但都係儲得唔多錢(因為人工少…)，所以就決定食平啲。我因為要返多份兼職，一日基本至少兩餐都喺出面食。我朝早就食廿幾蚊啲早餐，下午就喺下午茶時間食(彈性食飯時間)，因為平啲，夜晚就食叮叮飯。
嗰陣喺便利店見到「飯飯店」套餐，真心覺得抵，因為連埋嘢飲先$23，如果有優惠券或者推廣，淨係畀十幾蚊，咁平喺邊度搵？坦白講，十幾廿蚊質素，好食就一定唔會，但又未至於難食，而且有幾款飯揀，都算過得去，所以我都食咗大半年。
有同事問我，點解日日食叮飯？要平都有其他選擇阿，好似有啲蒸飯，都係廿幾蚊，起碼健康啲阿。嗰陣買叮飯，除咗平，係因為度度都有便利店，好方便，而且叮一叮就食得。不過，而家事後諗返，確實叮叮唔係最好選擇，間唔時食下都還可以，長期食，對身體確實冇益。
其實，想食得平啲，有其他選擇，例如蒸飯，車仔麵。如果有時間，甚至可以自己煮，成本唔貴，有益有營養，例如早餐食麥皮加奶，加隻蛋。慳錢唔係問題，但係健康都好緊要。千祈唔好為咗慳錢，影響自己身體，如果唔係得不償失。
如果想更多有關極簡環保、財務管理、黃店介紹以及生活的照片，歡迎FOLLOW我們的IG～ YIMUT7.13
