以先生啱啱畢業嘅時候，除咗返正職之外，仲返多份兼職，因為每個月可以賺多兩千幾蚊收入。嗰陣正職只有萬幾蚊，兩千幾蚊額外收入，話多唔多，話少唔少。
不過，自從返多份工之後，覺得除咗時間少咗，精神亦都差咗，因為份兼職每日都要好早起身，雖然返工時間唔長，但係都算係一種折磨。返兩份工嘅狀況維持咗大概一年半左右，一共只係儲多咗三萬幾蚊。
返正職，有時間剩，係咪真係返多份工好過？
答：可免則免。要善用時間，增值自己，學多啲嘢，包括投資。
返兩份工，結果就係，每日除咗返工，仲係返工。大家冇時間做自己嘢，不論係同朋友聯誼，抑或係增值自己。大家想增加財富，應該要諗，除咗返工「主動收入」之外，有冇「被動收入」 ─ 即係唔使返工，都會有收入呢？例如，買股票收下息之餘。
以先生之所以會識啲信用卡套現大法，就係平時收工之後，善用時間，慢慢學返嚟。每人時間有限，大家千祈唔好噉短視，覺得返多份工，多幾千蚊好重要。反而係要諗，點樣好好利用時間，會學多啲嘢，增值自己，為自己未來作打算。如果大家持續增值自己，可能好快就可以轉份人工高啲嘅工，到時就唔使返多份工。
返多份工，抑都唔係完全冇用，除咗有額外收入，抑都可以有多啲工作經驗，同擴闊自己圈子。
以先生知道，有時唔係想返多份工，而係唔返多份工唔得，因為有經濟壓力，家庭負擔。所以，如果大家真係要返多份工，亦都可以喺份工度，學多啲嘢，吸收經驗，擴闊圈子。不過，最重要係，大家要好好平衡時間，喺僅餘時間增值自己，為未來打算。
如果想更多有關極簡環保、財務管理、黃店介紹以及生活的照片，歡迎FOLLOW我們的IG～ YIMUT7.13
