相比起恒生信用卡，大新卡冚卡要收1%手續費，唔算吸引(因為恒生係免手續費)，但係大新可以找到更加多銀行嘅卡數。但係，比起東亞卡冚卡嚟講，大新就更方便，因為大新唔使等到推廣就用得，而且唔使等回手續費(東亞推廣雖然會免5%手續費，但要差唔多兩個月先回贈返)。
大新銀行信用卡，可以用1%手續費找所有銀行嘅信用卡卡數，不過就要去大新銀行填表格開通個功能先。如果你用大新信用卡找渣打信用卡$10,000卡數，你就要畀1%手續費，即係$100。
雖然呢張表格可以自己填定先，但係就算唔填，去到分行同職員講，佢哋都會幫你填，只要你準備好自己張信用卡，同埋你要繳交其他銀行信用卡嘅資料就冇問題。話就話，可以唔去分行填，自己填定再郵件都得。但係本人就唔建議，因為如果自己填錯咗，銀行未必會話你知，一來一回會徙唔少時間。
首次開通找其他銀行信用卡功能先要填表格，之後就算要加其他銀行信用卡NO.，都可以直接喺e-banking處理就得，唔使噉麻煩。
