「以先生阿，我有啲緊要事，要同你借幾萬蚊阿，你唔使擔心，我會寫埋借據畀你。」
『冇問題啦，大家咁熟，又識咗咁多年，唔通你呃我咩。』
識咗咁多年，其實都唔等於啲咩…
當時借錢畀朋友，都冇問啲咩，因為覺得大家大大話話都識咗十年以上，而且又寫咗借據，諗住冇咩問題。後尾先知原來佢係借嚟「做生意」，噉聽落都好似冇乜嘢阿。
有一日，佢突然叫我上佢公司參觀，唔上由至何，一上先知，原來所謂「做生意」就係傳銷。一上到去，就畀佢啲同事疲勞轟炸，足足有兩個幾鐘，說你一齊「做生意」。當然啦，所謂「做生意」就係畀錢買產品，之後搵下線。如果意志唔夠堅定，真係可能會落沓，因為佢哋用好多心理學技巧，又搵一啲背景相似嘅人嚟說你。唔好以為好少人中伏，我見眼當場唔少男女老幼，都好開心噉一齊準備「做生意」，甚至有啲係一家大細。
事後我問返朋友，佢當然唔覺得自己係做傳銷啦，佢堅稱自己係「做生意」，而且覺得係冇問題，仲搵到錢。所以話，識咗好多年，並唔代表啲咩。因為人會變，月會圓。佢叫你「做生意」，可能真係想你同佢一齊賺大錢，因為佢自己都唔知自己畀人呃…。更加令人擔心嘅係，原來佢問咗好多人借錢，計計埋埋都十幾廿萬。當時我已經好擔心，自己筆錢會唔會凍過水。
寫咗借據，可以係一紙空文
唔借都借咗，曾經借啲意催佢早啲還錢，當然係失敗告終。惟有等到期日，望佢會生生性性還錢。期間，真係心掛掛，寢食難安，因為我知佢好大機會「生意失敗」，而且借咗人咁多錢，還唔還到都係一個大問題。
終於到咗還錢嘅時候，點知，佢真係冇錢還！救命阿，又唔可以同佢反面，因為噉樣好大機會更加唔還錢。結果惟有一拖再拖，足足遲咗一年左右，先收得返啲錢。期間，我要動之以情(大家噉多年朋友，你有難，我二話不說就借錢畀你)；說之以理(有哂借據，而且我都寬限咗你啦)。真係出盡牙力，敢怒而不敢言，差啲就想「屌柒」佢。
有哂借據，使乜同佢講咁多，採取法律行動咪得囉！
我唔係未諗過，但原來現實係行唔通！入稟小額錢債審裁處，就算判你勝訴，對方都唔一定要還錢。你可以畀錢搵執達吏上門，但對方可以唔應門。不過，你都可以申請破門令，但如果對方屋企都係空空如也，冇錢還，你真係吹佢唔脹！呢啲只係民事，又唔係刑事，所以係唔使坐監。要攪咁多嘢，仲要未必拎得返啲錢，所以我都係諗下就算。
經一事長一智，其實識咗幾耐都好，都唔應該借錢，因為講錢傷感情。對方冇錢還，或者唔還錢，點算好？借嘅時候就乜都好，叫還錢嘅時候，就十問九唔應，因為債仔幾時都大哂！其實，而家借錢咁方便，大家根本冇需要問朋友借錢。如果連財務公司都唔肯借錢畀佢，你借畀佢，都係凍過水。
