Member-only story
以前出街買嘢，好多細鋪頭都剩係收現金唔收八達通，更加唔使講用信用卡。但自從話發放電子消費券之後（如果有得揀，以先生都係想現兜兜收現金多啲），發現真係多咗細鋪頭收非現金交易！對於唔鍾意帶咁多現金嘅人嚟講，真係一大喜訊。
但係，點解仲係咁多人或者鋪頭都剩係鍾意用現金呢？
對消費者嚟講
- 可以匿名。比較難去追查大家喺某年某月喺邊度消費。
- 比較實在。用現金交易，都係現兜兜喺銀包拎錢出嚟，大家使咗幾多錢會比較心中有數，冇咁易使大咗。
對商戶嚟講
- 唔使收手續費。如果用電子支付，商戶每單交易閒閒哋都要畀1.5% 手續費，變相減少咗自己嘅收益。
- 隱藏交易記錄。如果用電子支付，所有嘅交易記錄都一目了然，如果某啲商戶想逃稅或交者交少啲稅就比較困難。
針冇兩頭利，現金交易都有佢嘅壞處。
- 多菌。其實唔講都知，啲錢經咁多人接觸，真係咩人咩環境都有。新聞都有講，啲現金含菌量高過廁所板N倍，又話喺疫情之下，銀紙會成為「播毒溫床」。
- 麻煩。出街帶銀紙都算，如果找錢收到「神沙」都幾麻煩，因為要拎散銀包「安置」佢哋。就算對商戶都係一樣，因為商戶處理銀紙，「神沙」都有成本。
- 唔安全。如果唔見銀包…，當然如果真係唔見銀包，其實八達通同信用卡都會唔見，但係如果你用手機畀錢，即係好似Apple Pay嗰啲，就算真係唔見咗，人哋都用唔到，除非佢哋有你密碼啦。
噉用非現金交易/電子支付有咩著數？
- 方便。而家一部手機，就可以畀到錢，不論係信用卡定係八達通都可以加入手機。
- 交易記錄一目了然。平時大家可能唔知啲錢使咗喺邊，但只要打開部手機，就可以睇返哂啲交易記錄。
- 有好多優惠。而家用信用卡閒閒哋都有1.5% — 2%回贈，如果有推廣優惠，甚至會有5%回贈，真係小數怕長計。另外，信用卡又有啲免息免手續費分期優惠，變相大家可以賺通脹，又可以手頭鬆啲。
- 增加現金流。用非現金交易，好多時都係下個月先找數(就算八達通都可以用信用卡增值)，變相大家可以有多啲現金流。
非現金交易/電子支付真係噉好？都唔係嘅。
- 容易使大咗。大家用電子支付，好多時使咗都唔覺眼，因為始終唔係現兜兜畀錢。而且，用信用卡又可以先使未來錢，變相不經不覺會使凸咗好多錢，而自己唔察覺。
- 被盜用風險。雖然用非現金交易被人盜用風險唔大，如果你唔係用實體信用卡，而係用手機畀錢。但係，間唔時都聽到有人被人盜用。當然，而家有啲銀行可以喺手機APP鎖卡，變相都減少咗風險。
結總，希望多啲鋪頭可以用非現金交易，因為始終交便到市民又對商戶有利。如果啲小商戶想彌補手續費，其實賣貴少少，可能都冇咩人介意，因為信用卡啲回贈都夠畀有凸。
