Member-only story
開信用卡好大風險，唔見咗，或者被人盜用，乜都冇阿！真唔真？
首先，如果大家唔見得信用卡，我諗好大機會係銀包唔見咗，如果銀包唔見咗，閣下嘅身份證、八達通、現金等等，都會一齊冇埋。所以，問題唔係喺信用卡度，而係大家要小心啲保管自己嘅貴重物品。如果真係唔見咗信用卡/被人盜用，大家可以即時報失信用卡，有關被盜用嘅使費，係唔使畀嘅，不過就要經一翻調查。另外，而家唔少銀行，以匯豐為例，都可以喺個APP度鎖咗張卡，只要大家唔用嘅時候鎖咗佢，就冇問題。
其實信用卡可以唔使帶張實體卡出街都得，只要大家用Apple Pay, Google Pay，甚至BOC PAY(二維碼付款)都得，大部份商戶都用得(當然仍然有部份食肆或者商戶係要收實體卡)，只要大家有部手提電話就得。當然啦，如果你話，我驚手提電話都唔見，噉就冇得講啦。
信用卡找卡數雖然唔麻煩，但係我成日唔記得幾時找卡數，而且我又好多張卡，點算阿？
只要大家填表格，向銀行設定自動過數就可以。以先生以前係用iphone APP「提醒事項」記低自己邊日要找卡數。不過，隨住自己越嚟越多卡信用卡，就開始轉咗用Planto APP，呢個APP 可以將所有你銀行嘅資產，交易記錄，幾時找卡數等等列哂出嚟，噉大家就唔使擔心唔記得找卡數。不過，呢個APP 係要入銀行密碼，而且而家仲要收費，所以大家自己衡量下。如果唔想管理咁多張卡，建議大家申請一張卡，乜消費都有1.5–2%回贈，好似渣打Simply Cash (1.5%)，或者係安信EARNMORE(2%)，咁就唔使煩。
我好驚用咗信用卡會亂使錢，但又要有張卡網購，或者平時買吓嘢，有咩計？
以先生以前講過，信用卡只係工具，會唔會亂使錢，在於大家財務管理。不過，如果大家真係好擔心，可以開張預付卡(Prepaid card)，目前有O!ePay Mastercard 同「拍住賞」Mastercard，大家可以從銀行戶口或者用現金喺便利店增值。有幾多錢，先可以使幾多錢，噉就唔使擔心先使未來錢。另外，大家亦都可以用Debit card(扣賬卡) ─ 直接喺銀行戶口扣錢，而家好多虛擬銀行都有出，而且仲有至少1% 回贈，網購甚至有6–8%。
