話說2月10日嗰陣，喺連登見到個POST「(恆生派錢) 中咗omicron 就送你港幣$18萬」，心諗有冇咁著數阿？不過睇下條款，又睇下呢份保險推出嘅日子(大概係一月)，就覺得好合理，因為嗰陣疫情仲係得零聲個案，所以對恒生嚟講，啲人要拎18萬根本就微乎其微。點知後尾越爆越勁，有幾千單，而網上又瘋傳中招可以賠18萬，可能恒生見勢色唔對，就喺2022年2月11日更改條款，喺11號打後買，中招賠$2,800。
不過，我喺2月10日趕到尾班車，申請咗呢份保險。諗住咁大間銀行，點都會批份保單啩，話哂我都跟足程序申請，step by step。等咗接近一個月，恒生銀行終於send message 嚟，話我嘅申請「不被接納」，但個message 係冇講原因，噉我梗係打去問啦，嗰職員話唔係好清楚，幫我問問。過咗兩三日收到電話，話係「行政理由」，聽完我一舊雲，噏乜？講咗等於冇講。
原來苦主眾多，被拒申請嘅理由形形式式。喺網上見到，恒生以(1) 填寫嘅個人資料，同你而家銀行資料有出入；(2) 冇收到「閣下提交的核保資料」；(3) 聯絡唔到申請人等等。點知，可能太多人覺得啲理由唔make sense，因為如果啲資料有出入，點解冇人聯絡？有人話，根本冇收到恒生聯絡過佢哋。雖然以上嘅理由可能牽強，但起碼聽落去都似一個理由，但「行政理由」究竟係乜？我真係大惑不解。
當然啦，保單唔批，我冇實際上嘅錢銀損失，但冇諗過咁大間銀行，竟然用呢啲理由拒批申請。雖然我明，如果一萬人投保，過完冷靜期中招，又跟足程序claim錢，恒生就要賠1.8億，噉樣對銀行真係好大損失。但係，都冇得輸打贏要㗎嘛。所以，下次買恒生保險，真係要諗諗先！
